Sunday, May 25, 2008

മദ്യപാനിയായിത്തീരുന്ന 'പരിശുദ്ധ'നോഹ

മഹാപ്രളയവും മരണപ്പെട്ടകവും - (3) കലാശക്കൊട്ടു്

അങ്ങനെ, പ്രളയാവസാനം ഭൂലോകത്തിലെ സകല പാപികളും ചത്തു് സ്ഥലം കാലിയാക്കി. ദൈവത്തിന്റെ കമ്പ്യൂട്ടറിലെ ഹാര്‍ഡ്‌ ഡിസ്കില്‍ ഇഷ്ടം പോലെ സ്ഥലം ബാക്കിയായി. ചത്തവരുടെ കൂട്ടത്തില്‍ മുലകുടിക്കുന്ന കുഞ്ഞുങ്ങള്‍ വരെയുണ്ടായിരുന്നു. യഹോവ അങ്ങനെയാണു്. കലിപ്പങ്ങു് കയറിയാല്‍ പിന്നെ കുഞ്ഞുമില്ല കുട്ടിയുമില്ല, പാമ്പുമില്ല പഴുതാരയുമില്ല! കോപം കൊണ്ടു് കണ്ണു് കാണാതായാല്‍ മോശെക്കു് പ്രത്യക്ഷപ്പെട്ട യഹോവ മോശെയെപ്പോലെ തന്നെയാണു്. ദൈവം സ്വന്തം കൈകൊണ്ടു് എഴുതിയ പത്തു് കല്‍പനകളുടെ കല്പലകകള്‍ ദ്വേഷ്യം കേറീപ്പൊ മോശെ എറിഞ്ഞങ്ങടു് പൊട്ടിച്ചില്ലേ? കാളക്കുട്ടീനെ അരച്ചു് കലക്കി എല്ലാത്തിനേം കുടിപ്പിച്ചില്ലേ? സ്വഭാവം കൊണ്ടു് രണ്ടുപേരും ഒന്നുതന്നെ! കലി കേറിയാല്‍ പിന്നെ മോശെക്കും ദൈവത്തിനും തന്നെത്താന്‍ പിടിച്ചാല്‍ പോലും പിടി കിട്ടില്ല! ഇരട്ടപിറന്നതുപോലത്തെ പെരുമാറ്റം.

പ്രളയവും barbecue സദ്യയും കഴിഞ്ഞപ്പോഴേക്കും ദൈവത്തിന്റെ കോപമടങ്ങി തല ഒട്ടൊന്നു് തണുത്തിരുന്നു. ദൈവകോപം അടങ്ങി എന്നതിനു് അടയാളമായി തന്റെ വില്ല് ചേലൊത്തൊരു കാവടിപോലെ ആകാശത്തില്‍ നിവര്‍ത്തിനിര്‍ത്തിയശേഷം ഒരു മേഘടാക്സി (AC, DVD ഒക്കെ ഒള്ള ഒരു പുത്തന്‍ ടൂറിസ്റ്റ്‌ ടാക്സി!) വിളിച്ചു് ദൈവം സ്വര്‍ഗ്ഗത്തിലേക്കു് പോയി. ആണുങ്ങള്‍ പൊട്ടു് തൊടുകയും, സ്വന്തം ശരീരത്തില്‍ ഒരു ക്യാന്‍വാസില്‍‌ എന്നപോലെ വര്‍ണ്ണചിത്രങ്ങള്‍ വരക്കുകയുമൊക്കെ ചെയ്യുന്ന ഏതോ ഒരു നാട്ടില്‍ ഇന്ദ്രചാപം എന്നു് പേരുനല്‍കി വിളിക്കപ്പെടുന്ന ചാപമല്ല യഹോവ പ്രതിഷ്ഠിച്ച ഈ ചാപം. ആ ചാപം വേറെ. അതു് ചുമ്മാ വെറും പാപചാപം. ഈ ചാപം സാക്ഷാല്‍ പാപമോചനചാപം. ശാപചാപവും ദൈവചാപവും തമ്മില്‍ തെറ്റിദ്ധരിക്കരുതു്. കളിമാറും! അപാലാപത്തില്‍ ആഘാതമേറ്റാലെന്നപോലെ വിലാപഗീതങ്ങള്‍ ആലപിക്കേണ്ടിവരുമെന്നു് നാടന്‍ഭാഷ! 'വയ്ക്കോലില്‍ ഇട്ടു് ചക്ക വെട്ടിയപോലെ ആവും' എന്നും വേണമെങ്കില്‍ പറയാം.

ദൈവത്തിനു് റ്റാറ്റാ പറഞ്ഞശേഷം നോഹയും കുടുംബവും ജീവിക്കാന്‍ പറ്റിയ മാര്‍ഗ്ഗങ്ങളെപ്പറ്റി ആലോചിച്ചു. ആദ്ധ്യാത്മികത വഴി എളുപ്പം കോടീശ്വരനാവാമെന്നു് നോഹക്കറിയാമായിരുന്നു. വലിയ മുതല്‍ മുടക്കില്ല താനും! ആവശ്യത്തിനു് ഇറക്കമുള്ള ഒരു കാവിവസ്ത്രം വേണമെന്നേയുള്ളു. അങ്കിയുടെ നിറം ബന്ധപ്പെട്ട സാമൂഹികഘടനയുമായി താദാത്മ്യം പ്രാപിക്കാന്‍ പര്യാപ്തമായിരിക്കണം. അതു് വളരെ പ്രധാനപ്പെട്ട കാര്യമാണു്. ഇറക്കം തീരെ കുറഞ്ഞാല്‍ കണങ്കാലിലെ രോമവും അരിമ്പാറയും പുഴുക്കടിയുമൊക്കെ കാല്‍ മുത്തുന്ന (നക്കുന്ന) ഭക്തന്മാര്‍ കാണും. അന്നേരം അവര്‍ക്കൊരു ഇമ്പ്രഷന്‍ ഉണ്ടാവില്ല. സ്വാമിയാണെങ്കിലും പുഴുക്കടിയേലൊക്കെ മുത്തുക, തലോടുക എന്നൊക്കെ പറഞ്ഞാല്‍ ചിലരെങ്കിലും അറച്ചു് മാറിനില്‍ക്കും. എന്തിനാ വെറുതെ റിസ്ക്‌ എടുക്കുന്നെ. ഒരു സ്വാമി 'രോമയോ അരോമയോ', 'അരിമ്പാറയോ അനരിമ്പാറയോ' എന്നതെല്ലാം എന്നാളും രഹസ്യമായിരിക്കേണ്ട കാര്യങ്ങളാണു്. അത്ഭുതഗര്‍ഭം പോലെയാണതും. അത്ഭുതഗര്‍ഭം എന്നും ഒരു രഹസ്യമായിരിക്കണം. 'അരഹസ്യത്തില്‍' അത്ഭുതമില്ല. നീണ്ട ഒരു കുപ്പായം തുന്നിക്കൂട്ടുന്നതെങ്ങനെ എന്നതായിരുന്നില്ല നോഹയുടെ പ്രശ്നം. കാണിക്കയും നേര്‍ച്ചകാഴ്ചകളുമായി എത്താന്‍ മനുഷ്യരൂപമുള്ള ഏതെങ്കിലുമൊരു ഉണ്ണാക്കന്‍ ഭൂമിയില്‍ ഉണ്ടായിട്ടു് വേണ്ടേ? അസ്ഥികുടീരങ്ങള്‍ സ്പന്ദിക്കാറുണ്ടെങ്കിലും നേര്‍ച്ചയിടാറില്ലല്ലോ! കാക്കകളും കിളികളുമൊക്കെ ഭണ്ഡാരം ഉപയോഗിക്കുന്നതു് 'ഉന്നം' പണ്ടേപ്പോലെ ഫലിക്കുന്നുണ്ടോ എന്നൊന്നു് പരിശോധിക്കണമെന്നു് 'അനുഭവങ്ങളിലെ പാളിച്ചകള്‍' വഴി തോന്നുമ്പോള്‍ മാത്രമാണുതാനും. കാഷ്ടം കൊടുത്താല്‍ ബെന്‍സും കൈത്തോക്കും കിട്ടുമോ? ഒരു സ്വാമിക്കു് പുതിയ പുതിയ ആശ്രമങ്ങളിലേക്കു് കൈമാറിപ്പിടിച്ചു് കാലുമാറ്റിച്ചവിട്ടുവാന്‍ അത്തരം കളിപ്പാട്ടങ്ങള്‍ minimum requirements ആണെന്നു് ആര്‍ക്കാണറിയാത്തതു്?

അവസാനം, നോഹ പണ്ടത്തെ കയീനെപ്പോലെ കര്‍ഷകനാവാന്‍ തീരുമാനിച്ചു. അവര്‍ നാലാണും നാലു് പെണ്ണും കൂടി കഠിനമായി അദ്ധ്വാനിച്ചു. അയല്‍വാസിയായ ഒരു അണ്ണാറക്കണ്ണനും തന്നാലാവുന്നതു് എന്തൊക്കെയോ ചെയ്തു. പലതും ചെയ്തു എന്നല്ലാതെ, എന്തൊക്കെയാണു് അവന്‍ ചെയ്തുകൂട്ടിയതെന്നതിനെസംബന്ധിച്ച കൃത്യമായ രേഖകള്‍ ഇതുവരെ കണ്ടുകിട്ടിയിട്ടില്ല. രാപ്പകലില്ലാതെ അവര്‍ ഉഴുതുമറിച്ചു് കൃഷി ചെയ്തു. റബ്ബര്‍, കശുവണ്ടി, വെള്ളിലാവു്, കടലാവണക്കു്, കൂര്‍ക്കക്കിഴങ്ങു്, ഒടിച്ചുകുത്തിനാരങ്ങ, കച്ചോലം, വെന്തിപ്പൂ, തൊട്ടാവാടി, അയമോദകം, കൊന്തന്‍പുല്ല്, നാലേമുക്കാല്‍മണിപ്പൂവു് അങ്ങനെ 'സകലഭൂമിയിലുമുള്ള' മരങ്ങളും ചെടികളും പുല്ലുകളും അവര്‍ നട്ടുപിടിപ്പിച്ചു. ബാക്കിവന്ന സ്ഥലത്തു് തടമെടുത്തു് ഒരുപാടു് മുന്തിരിയും നട്ടു. അതിനുശേഷം എല്ലാത്തിനും വെള്ളമൊഴിച്ചു്, കണ്ണില്‍ എണ്ണയൊഴിച്ചു് പ്രത്യാശയോടെ കിഴക്കോട്ടു് നോക്കി അവര്‍ കാത്തിരുന്നു് പ്രാര്‍ത്ഥിച്ചു. പ്രാര്‍ത്ഥനയുടെ തീവ്രതമൂലം എല്ലാം പത്തും നൂറും മേനി വിളവുനല്‍കി. എല്ലാ വിളവിന്റേയും ദശാംശം അവര്‍ ദൈവം ഇനി പ്രത്യക്ഷപ്പെടുമ്പോള്‍ കൊടുക്കാനായി നീക്കിവച്ചു. ദൈവത്തിനു് ഒരു 'സംതിംഗ്‌' കൊടുക്കുക എന്ന രൂപത്തിലല്ല, ഉദ്ദിഷ്ടകാര്യം സാധിച്ചതിനു് ഉപകാരസ്മരണ എന്നതു് ഒരു ബാദ്ധ്യതയാണെന്ന നിലയില്‍.

ഉത്തമഗീതങ്ങളില്‍ അനുരാഗലോലയായ കാമിനിയെ അംഗോപാംഗം നിരീക്ഷിക്കുന്ന ശലോമോന്റെ സ്തനവര്‍ണ്ണനപോലെ മുന്തിരിക്കുലകള്‍ തോട്ടം മുഴുവന്‍ വിളഞ്ഞുനിറഞ്ഞു - ഉത്തമഗീതങ്ങള്‍ 7: 9. (ശലോമോന്റെ ഉത്തമഗീതങ്ങള്‍ വായിച്ചിട്ടുള്ള, കഴിക്കാന്‍ അനുവാദമില്ലാത്തതുകൊണ്ടുമാത്രം കല്യാണം കഴിക്കാത്ത, അല്ലെങ്കില്‍ എത്രയോ വട്ടം കഴിക്കുമായിരുന്ന പുരോഹിതരുടെ ഇടയില്‍ 'celibacy പകല്‍ മാത്രം മതി' എന്നൊരു ചിന്താഗതി രാത്രികാലങ്ങളില്‍ ശക്തമാവാറുണ്ടത്രേ! പല 'കന്യകന്മാരിലും കന്യകമാരിലും' നിലാവുള്ള രാത്രികളില്‍ ഇതൊരു last minute panic ആയി, ബോട്ട്‌ മിസിംഗ്‌ ഭയമായി രൂപാന്തരപ്പെടുകയും, അതു് പലപ്പോഴും പല അവിഹിതബന്ധങ്ങളിലേക്കും, അത്ഭുതഗര്‍ഭങ്ങളിലേക്കും, ദുരൂഹമരണങ്ങളിലേക്കും ഒക്കെ നയിക്കുകയും ചെയ്യാറുണ്ടെന്നുള്ളതു് എല്ലാവര്‍ക്കും അറിയാവുന്ന, എന്നാല്‍ ആര്‍ക്കും അറിയാന്‍ പാടില്ലാത്ത ചില റിയാലിറ്റികളാണുതാനും. നമുക്കു് വിലപ്പെട്ട ആദ്ധ്യാത്മികസോപ്പുകുമിളകള്‍ പൊട്ടാതിരിക്കാന്‍ എന്തെന്തു് കാര്യങ്ങള്‍ അറിഞ്ഞില്ലെന്നു് നടിക്കാനും, അറിഞ്ഞവരെ എന്തു് മാര്‍ഗ്ഗമുപയോഗിച്ചും നിശ്ശബ്ദരാക്കാനും നമ്മള്‍ തയ്യാറാവുകയില്ല!?) അതെന്തായാലും, മുന്തിരി വിളഞ്ഞപ്പോള്‍ ഭക്‍ഷ്യസുരക്ഷാനിയമപ്രകാരം മുന്തിരിക്കുലകള്‍ ഇറുത്തെടുത്തു് വീഞ്ഞുണ്ടാക്കി നൂറുകണക്കിനു് അഥവാ, കടല്‍ത്തീരത്തെ മണല്‍ത്തരികളും ആകാശത്തിലെ നക്ഷത്രങ്ങളും പോലെ എണ്ണമറ്റ തടിവീപ്പകളില്‍ നിറച്ചു് സൂക്ഷിക്കാന്‍ നോഹ തീരുമാനിച്ചു.

ദൈവഭക്തര്‍ക്കു് ജപം പോലെതന്നെ കുടിയും തുടങ്ങിയാല്‍ പിന്നെ നിര്‍ത്തുക എന്നതു് വലിയ ബുദ്ധിമുട്ടാണു്. കാരണം, അവര്‍ ബലഹീനരാണു്. സ്വന്തം ബലഹീനത കോമ്പന്‍സേറ്റ്‌ ചെയ്യാനല്ലേ അവര്‍ ബലവാനായ ദൈവത്തെ വിടാതെ കൂട്ടുപിടിച്ചിരിക്കുന്നതു്? നോഹയും ഒരു പക്കാ ഭക്തനായിരുന്നു. അതുകൊണ്ടാണല്ലോ ദൈവം അവനെയും കുടുംബത്തെയും മാത്രം പ്രളയത്തില്‍ നിന്നും രക്ഷിച്ചതും! ഒരിക്കല്‍ നോഹ പതിവുപോലെ വീഞ്ഞുകുടിച്ചു് ബോധമില്ലാതെ ഭയങ്കരമായി 'മൂര്‍ഖന്‍' വലിച്ചു് കൂടാരത്തില്‍ കിടന്നുറങ്ങുകയായിരുന്നു. കുളിച്ചു എന്നു് കാണിക്കാന്‍ 'അണ്ടര്‍വയര്‍' ഊരി പുരപ്പുറത്തിട്ടിരുന്നതുകൊണ്ടു് അന്നത്തെ ദിവസം അങ്കിയുടെ അടിയില്‍ 'അടിവയര്‍' മറയ്ക്കാന്‍ മറ്റൊന്നും ധരിക്കാതെ ആയിരുന്നു നോഹയുടെ ഔദ്യോഗിക കാര്യപരിപാടികള്‍. ഉറക്കത്തില്‍ തുണി അഴിഞ്ഞു് താന്‍ നഗ്നനായതും അതിനോടൊപ്പം 'എന്തതിശയമേ ദൈവത്തിന്റെ...' എന്ന background music ഉയര്‍ന്നതും നോഹ അറിഞ്ഞില്ല. ഈ സമയത്തു് ഹാം എന്ന ചെക്കന്‍ ഒരു കുറ്റിബീഡി കത്തിക്കാന്‍ തീപ്പെട്ടി തപ്പി അവിടെ കേറിച്ചെന്നു. പിന്നണിഗാനം 'വൃശ്ചികപ്പൂനിലാവേ ... മച്ചിന്റെ മേലിരുന്നൊളിച്ചുനോക്കാന്‍ നിനക്കു് ലജ്ജയില്ലേ?' എന്നായി മാറി. പഴയ പ്ലേറ്റായതുകൊണ്ടു് കറങ്ങുന്നിടത്തുതന്നെ കിടന്നു് കറങ്ങി 'ലജ്ജയില്ലേ? ലജ്ജയില്ലേ?' എന്നു് വീണ്ടും വീണ്ടും ആവര്‍ത്തിച്ചുകൊണ്ടിരുന്നു. അതു് സ്വര്‍ഗ്ഗത്തില്‍ നിന്നുള്ള ഒരു അശരീരി ആയി കരുതിയ അവന്‍ ഭയന്നു് വിറച്ചു. "യഹോവയായ ദൈവമേ, പാപിയായ എന്നോടു് നീ പൊറുക്കേണമേ! നിന്‍ തിരുമുന്‍പില്‍ ഞാനാരു്? എന്റെ കുറ്റിബീഡി എന്തു്? ഞാന്‍ വെറുമൊരു ഞാഞ്ഞൂല്‍; ഒന്നിനും കൊള്ളാത്ത ഒരു പൃക്ക! എനിക്കു് ലജ്ജയുണ്ടു്, ഞാന്‍ ലജ്ജിക്കുന്നു, ഞാനിതാ മറയുന്നു കര്‍ത്താവേ! " എന്നു് കുറ്റബോധത്തോടെ വിളിച്ചുപറഞ്ഞുകൊണ്ടു് അവന്‍ പുറത്തിറങ്ങി ഓടിച്ചെന്നു് സഹോദരന്മാരെ വിവരമറിയിച്ചു.

അവന്റെ സഹോദരന്മാര്‍ വളരെ ബുദ്ധിമാന്മാരായിരുന്നു. മനുഷ്യര്‍ക്കു് പുറകില്‍ കണ്ണില്ല എന്ന ഒരു കച്ചിത്തുരുമ്പു് മാത്രമാണു് വിധിനിര്‍ണ്ണായകമായ ഈ ഘട്ടത്തില്‍ തങ്ങളുടെ ഒരേയൊരു രക്ഷാമാര്‍ഗ്ഗം എന്നവര്‍ മനസ്സിലാക്കി. അവര്‍ ഒരു തുണിക്കഷണവുമായി പുറകോട്ടു് നടന്നുചെന്നു് വളരെ തന്മയത്വമായി കൈയിലെ തുണി പുറകോട്ടു് ഒറ്റ ഏറങ്ങു് വച്ചുകൊടുത്തു. അതേറ്റു എന്നു് പറഞ്ഞാല്‍ മതിയല്ലോ. തുണി വീഴേണ്ടിടത്തു് തന്നെ ചെന്നു് വീണു. 'തുണി പുറകോട്ടു് എറിയുക' എന്ന ഡിസിപ്ലിനില്‍ അവര്‍ ഏഷ്യന്‍ ഗെയിംസിലെ ചാമ്പ്യന്മാര്‍ ആയിരുന്നു! അങ്ങനെ അവര്‍ പിതാവിന്റെ നഗ്നതയുടെ ദര്‍ശനം വഴി ആര്‍ക്കും ശാശ്വതമോ മാരകമോ ആയ ദോഷഫലങ്ങള്‍ ഉണ്ടാവാതിരിക്കാന്‍ വേണ്ട അത്യാവശ്യനടപടികള്‍ വിദഗ്ദ്ധമായി പൂര്‍ത്തിയാക്കി. നോഹയുടെ നഗ്നതയുടെ പേരില്‍ മനുഷ്യരാശിയുടെ ഭാവിതന്നെ വെറുമൊരു വാഴനാരില്‍ തൂങ്ങിക്കിടന്നു് ക്ലോക്കിന്റെ പെന്‍ഡുലം പോലെ അങ്ങോട്ടും ഇങ്ങോട്ടും ആടുകയായിരുന്നല്ലോ! ഉറക്കമുണര്‍ന്നു് നീര്‍ക്കുതിരഫോര്‍മാറ്റില്‍ വിശദമായി ഒരു കോട്ടുവായും വിട്ടു് മൂത്രമൊഴിക്കാന്‍ പോകാന്‍ തുടങ്ങിയപ്പോഴാണു് നോഹ the terrible dramatic of the complete history അറിയുന്നതു്. ആരെയെങ്കിലും ഒന്നു് ശപിക്കാഞ്ഞാല്‍ ഈ നഗ്നതാപ്രശ്നത്തിനു് എന്തെങ്കിലും ഒരു ഗൗരവം വരുമോ? നാലുപേര്‍ ഇക്കാര്യം അറിയുമോ? (ഒരു ജനാധിപത്യത്തില്‍ ആഹാരാവകാശം ഇല്ലെങ്കിലും വിവരാവകാശമെങ്കിലും വേണ്ടേ? തങ്ങള്‍ക്കു് ആഹാരാവകാശം ഇല്ല എന്ന വിവരം അല്ലെങ്കില്‍ പിന്നെ ജനങ്ങള്‍ എങ്ങനെ അറിയും?)

നോഹ തന്റെ നഗ്നത കണ്ടവനായ ഹാമിനെ ശപിക്കുന്നതിനു് പകരം അവന്റെ മകന്‍ കനാനെ വിളിച്ചു: "ഡാ, കനാനെ! വാടാ ഇവടെ!" ആ 'കൊച്ചന്‍' ഓടിച്ചെന്നു. കോലുമുട്ടായിയോ, സിനിമകാണാന്‍ ചക്രമോ, ഭൗതികമായ മറ്റെന്തെങ്കിലും പ്രയോജനമുള്ള കാര്യങ്ങളോ തടയുമെന്നു് കരുതിക്കാണും ആ പാവം. അതിനുപകരം അവന്‍ കേട്ടതു്: "ഡാ കനാനെ, നിന്റെ വെല്യാപ്പനാകുന്ന ഞാനാകുന്ന ഞാന്‍ ഇന്നേദിവസം ഇനിമേലില്‍ എന്നേക്കുമായി നിന്നെ യഹോവയുടെ ന്യായപ്രമാണം (YNP) വകുപ്പു് 33, പാരഗ്രാഫ്‌ 13 പ്രകാരം ശപിച്ചിരിക്കുന്നു. നീ മറ്റു് സഹോദരന്മാര്‍ക്കു് ദാസനായിത്തീരും. പോ, എന്റെ കണ്ണുംവെട്ടത്തൂന്നു്, അസത്തേ!".

'കട്ടവനെ കിട്ടിയില്ലെങ്കില്‍ കിട്ടിയവനെ' ചിലര്‍ പിടിക്കാറുണ്ടു്. ഇവിടെ വേണമെങ്കില്‍ കട്ടവനെ തന്നെ പിടിക്കാമായിരുന്നു. എന്നിട്ടും നോഹ നിരപരാധിയെ ചാടിപ്പിടിച്ചു് ശിക്ഷിക്കുന്നു. തന്നത്താന്‍ കള്ളുകുടിച്ചു് ബോധം കെട്ടുറങ്ങിയതിന്റെ ശിക്ഷ ചുമ്മാതെയിരുന്ന പേരക്കിടാവിനു്! മുഴുവന്‍ മനുഷ്യരും പാപികളായിരുന്നപ്പോള്‍ പാപരഹിതരായിരുന്നതിനാല്‍ രക്ഷപെട്ട നോഹയുടെയും കുടുംബത്തിന്റെയും പില്‍ക്കാലചരിത്രമാണിതു്! സകലമാനലോകവും നിര്‍ദ്ദയം നശിപ്പിക്കപ്പെട്ടപ്പോള്‍ ദൈവം രക്ഷപെടുത്തിയ ഒരേയൊരു കുടുംബം! ദൈവദൃഷ്ടിയില്‍ പാപം, പുണ്യം, നന്മ, നീതി എന്നൊക്കെ പറഞ്ഞാല്‍ എന്താണെന്നു് പിടികിട്ടിയില്ലേ? ഇല്ലെങ്കില്‍ ദാ ഒരു സത്യവാചകം കൂടി. പ്രളയത്തെ അതിജീവിക്കാന്‍ നോഹയുടേതിനേക്കാള്‍ യോഗ്യതയുള്ള മറ്റൊരു കുടുംബമോ കൊച്ചോ പീച്ചിയോ അക്കാലത്തു് ജീവിച്ചിരുന്നില്ല എന്നു് ഞാന്‍ സത്യമായിട്ടും സത്യമായിട്ടും നിങ്ങളോടു് പറയുന്നു! കളരിപരമ്പരദൈവങ്ങളാണേ ഇതു് സത്യം, സത്യം, സത്യം! പരമസത്യം!

ഇനീം പോരാരിക്കും! അവിശ്വാസികളായ തോമാസുകളേ, സര്‍പ്പസന്തതികളെ, ഗൂര്‍ക്കാസഹോദരങ്ങളെ, നിങ്ങള്‍ക്കു് ഹാ കഷ്ടം! നിങ്ങള്‍ കേരളത്തില്‍ ജനിക്കും; സ്വാമിമാരും സ്വാധാകരന്മാരും നിങ്ങളെ ഭരിക്കും; നിങ്ങള്‍ ഏകജാലകത്തില്‍ പലജാലകങ്ങള്‍ കാണും; നിങ്ങള്‍ തുണിയില്ലാതെ ദൈവസന്നിധി തേടും; നിങ്ങള്‍ അരിക്കും ഗോതമ്പിനുമായി തമിഴ്‌നാട്ടിലേക്കു് നോക്കും, നിങ്ങള്‍ക്കോ ലഭിക്കുകയുമില്ല; നിങ്ങള്‍ റോഡ്‌ പണിയും, അതോ ഒഴുകിപ്പോകും; നിങ്ങള്‍ അണകെട്ടും, അതില്‍ തവളകള്‍ മുട്ടയിടും; നിങ്ങള്‍ LDF-നെ തെരഞ്ഞെടുക്കും, അവര്‍ നിങ്ങളെ ചതിക്കും; നിങ്ങള്‍ UDF-നെ തെരഞ്ഞെടുക്കും, അവര്‍ നിങ്ങളെ കൂടുതല്‍ ചതിക്കും; നിങ്ങള്‍ ആള്‍ദൈവങ്ങളെ തേടും, ആണ്‍ദൈവവും പെണ്‍ദൈവവും നിങ്ങളെ ചൂഷണം ചെയ്യും; നിങ്ങളോ തിരിച്ചറിയുകയില്ല; അറിയാത്ത പുള്ളകളായ നിങ്ങള്‍ അങ്ങനെ ചൊറിഞ്ഞാലും അറിയാതെ പിന്നെയും പിന്നെയും ചൊറിയും - അടിമോളെത്തി ചൊറിയും, ദേഹമാസകലം ചൊറിയും! അങ്ങനെ എന്നെങ്കിലും നിങ്ങള്‍ ജീവിക്കുന്നതിനു് പകരം ചൊറിഞ്ഞു് ചൊറിഞ്ഞു് മരിക്കും! മരിക്കുമ്പോഴും നിങ്ങള്‍ ആരെയെങ്കിലും, നിങ്ങളെ ആരെങ്കിലും ചൊറിഞ്ഞുകൊണ്ടേയിരിക്കും!! കാരണം, നിങ്ങളെസംബന്ധിച്ചു് “ചൊറിയലാണഖിലസാരമൂഴിയില്‍”!

പ്രളയത്തിനു് ശേഷം നോഹയുടെ മക്കള്‍ 'ജാതി ജാതിയായും കുലം കുലമായും' വേര്‍പിരിഞ്ഞു് ഭൂമിയില്‍ നിറയുകയായിരുന്നു. അവരുടെ വേര്‍പിരിയലിന്റെ കാരണം സാമ്പത്തികത്തില്‍ അധിഷ്ഠിതമായ വര്‍ഗ്ഗസമരമായിരുന്നിരിക്കണം. (അങ്ങനെയെന്തോ ചില നിഗമനങ്ങള്‍ ഒരുപാടൊരുപാടു് നാളുകള്‍ക്കു് ശേഷം കാര്‍ള്‍ മാര്‍ക്സ്‌ എന്നൊരു താടിക്കാരന്‍ യഹൂദന്‍ നടത്തിയിട്ടുണ്ടു്.) പ്രളയകാലഘട്ടത്തില്‍ മനുഷ്യരുടെ ആയുസ്സു് നൂറ്റിയിരുപതു് വര്‍ഷമായി ചുരുക്കാന്‍ ദൈവം തീരുമാനിച്ചിരുന്നെങ്കിലും, നോഹയുടെ പിന്‍തലമുറകളില്‍ പലരും നാനൂറും അഞ്ഞൂറും വര്‍ഷങ്ങള്‍ ജീവിച്ചിരിക്കുന്നുമുണ്ടു്. നോഹയുടെ മകന്‍ ശേം 500 വര്‍ഷം, അവന്റെ മകന്‍ അര്‍പ്പക്ഷാദ്‌ 403 വര്‍ഷം, അവന്റെ മകന്‍ ശാലഹ്‌ 403 വര്‍ഷം, അവന്റെ മകന്‍ ഏബര്‍ 430 വര്‍ഷം ... ! ദൈവതീരുമാനങ്ങള്‍ അത്ര കൃത്യമായി സംഭവിക്കണമെന്നു് നിര്‍ബന്ധം പിടിച്ചാല്‍ ശരിയാവില്ലാന്നു് ഗുണപാഠം. ദൈവത്തിനറിയാം ദൈവത്തിന്റെ ഓരോരോ കഷ്ടപ്പാടും ദുരിതങ്ങളും!

ദൈവം സംസാരിച്ചിരുന്നെങ്കില്‍:

"ദിവസത്തില്‍ ഇരുപത്തിനാലു് മണിക്കൂറും കുറെ എണ്ണങ്ങളു് സ്വൈര്യം തരാതെ 'ഹാലേലുയ്യാ സ്തോത്രം സ്തോത്രം'ന്നു് വണ്ടു് മൂളണപോലെ നിറുത്താണ്ടു് ചെവീലു് അങ്ങടു് മൂളാന്നു് വച്ചാ പ്രാന്തു് പിടിക്കില്യേ ദൈവത്തിനായാലും? അതിനെടേലു് സകല അലവലാതികളു്ടേം തലേന്നും മൂക്കീന്നുമൊക്കെ കൊഴിയണ രോമങ്ങളു് വരെ ഒരെണ്ണം പോലും വിടാതെ കൃത്യമായി എണ്ണണ പണീം ഞാന്‍ തന്നെ ചെയ്യണംത്രെ! എന്തെങ്കിലും ഒരു പ്രതിഫലം തന്നേച്ചാണെങ്കി വേണ്ടില്ല. എനിക്കോ എന്റെ യേശുമോനോ നെറ്റിയേലൊരു കുരിശുരൂപം പോറാന്‍ പത്തു് പൈസേടെ ഒരു തുട്ടുപോലും റോമന്‍ കത്തോലിക്കാസഭേന്നോ, റഷ്യന്‍ ഓര്‍ത്തഡോക്സ്‌ സഭേന്നോ, ഗ്രീക്ക്‌ ഓര്‍ത്തഡോക്സ്‌ സഭേന്നോ, അന്ത്യോക്യാ സിംഹാസനത്തീന്നോ, മലങ്കര സഭേലെ അണ്ടന്‍ അടകോടന്‍ സഭകളീന്നോ, (അവിടെ എത്ര സഭകളൊണ്ടെന്നു് എനിക്കും നല്ല നിശ്ചയില്യാന്നു് കൂട്ടിക്കോളൂ) ഇതുവരെ ഇങ്ങോടു് സ്വര്‍ഗ്ഗത്തിലേക്കു് തന്നിട്ടില്യാ. അറിയ്‌വോ നിങ്ങക്കു്? ഇവടേം ഇല്യേ ചെലവുകളു്? സ്വര്‍ഗ്ഗീയ തീന്മേശ ഒക്കെ ഒരുക്കാതെ പറ്റ്വോ? ഞാന്‍ പറഞ്ഞാലു് ഇത്തിരി അധികമായി പോവും. അതുകൊണ്ടു് മിണ്ടണില്യാ, അത്രന്നെ! ദൈവാത്രെ, ദൈവം"!!

പാവം ദൈവത്തിന്റെ കണ്ണു് നിറയുന്നു!

14 comments:

പ്രിയ ഉണ്ണികൃഷ്ണന്‍ May 25, 2008 at 7:25 PM  

ദൈവം നമ്മുടെ മനസ്സ് നിറയ്ക്കുമ്പോ അങ്ങോര്‍ടെ കണ്ണ് നമ്മള്‍ നിറച്ചു കൊടുക്കൂന്നു... അത്രെന്നെ

Simy Chacko :: സിമി ചാക്കൊ May 26, 2008 at 5:46 AM  

ഓ:ടോ: http://thatsmalayalam.oneindia.in/interview/20071103joseph-pulikkunnel-osana-church-jesus.html ഇല്‍ ഉള്ള അഭിമുഖം മുന്നെ വായിചിട്ടുണ്ടോ ? ഇതിലുള്ള ആശയങ്ങളേകുറിച്ചു, താന്കളുടെ അഭിപ്രായം അറിയാന്‍ താതപര്യപ്പെടുന്നു. ഇതുമായി ബന്ധപ്പെട്ട ലേഖനങ്ങള്‍ മുന്നെ എഴുതിയിട്ടുണ്ടെകില്‍ ലിന്ക് പബ്ലീഷ് ചെയ്താലും മതി. മുന്കൂര്‍ നന്ദി

സി. കെ. ബാബു May 26, 2008 at 11:52 AM  

പ്രിയ,
വായിച്ചതില്‍ സന്തോഷം. :)

സിമി ചാക്കൊ,
അതൊരു യാദൃച്ഛികതയാവാം: കത്തോലിക്കാസഭ Martin Luther-നെ heretic ആയി പ്രഖ്യാപിച്ചതു് ഇന്നേക്കു് 487 വര്‍ഷങ്ങള്‍ക്കു് മുന്‍പു് 1521 മേയ് 26-നായിരുന്നു!

Battle of Milvian Bridge-ല്‍ Constantine-I ജയിച്ചില്ലായിരുന്നെങ്കില്‍ ക്രിസ്തുമതം ഇന്നത്തെ രീതിയില്‍ ഉണ്ടാവുമായിരുന്നു എന്നു് തോന്നുന്നില്ല. “ക്രിസ്തീയ” ദൈവത്തിന്റെ നാമത്തില്‍ യുദ്ധം ചെയ്യാന്‍ അവനെ പ്രേരിപ്പിച്ചതിനെപ്പറ്റിത്തന്നെ പല അഭിപ്രായങ്ങള്‍ നിലവിലുണ്ടു്. ഒന്നില്‍ (Lactantius Version) പടയാളികളുടെ ഫലകങ്ങളില്‍ ഒരു monogram വരയ്ക്കണമെന്നൊരു നിര്‍ദ്ദേശം സ്വപ്നത്തില്‍ അവനു് ലഭിച്ചതായും, മറ്റൊന്നില്‍ (Eusebius Version) Maxentius-നെതിരായ സമരഘട്ടത്തില്‍ “ഈ അടയാളത്തില്‍ പൊരുതുക” എന്നൊരു ദര്‍ശനം ആകാശത്തില്‍ ഉണ്ടായതായും രേഖപ്പെടുത്തിയിട്ടുണ്ടു്. മൂന്നാമതൊരു വേര്‍ഷനില്‍ വിഗ്രഹാരാധനക്കാരനായ ഒരു വെളിച്ചപ്പാടിനു് അപ്പോളൊയില്‍ നിന്നും ലഭിച്ച ഒരു വെളിപാടാണു് അതിനു് പിന്നിലെന്നും കാണുന്നു.

Constantine കണ്ട അടയാളം ഒരു 'X'-ന്റെ നടുവിലൂടെ മുകളില്‍ നിന്നു് താഴെവരെ നീളുന്ന ഒരു 'P' ആയിരുന്നു, ഒരു കുരിശായിരുന്നില്ല.

പുലിക്കുന്നേലുമായുള്ള അഭിമുഖത്തിലെ കേരളസഭയെപ്പറ്റിയുള്ള പരാമര്‍ശങ്ങള്‍ നേരാവാന്‍ എല്ലാ ‍സാദ്ധ്യതകളുമുണ്ടു്. ആ വിഷയത്തില്‍ എനിക്കു് വലിയ താല്പര്യമില്ല. ബൈബിളില്‍ പോലും ദൈവികമായി ഒന്നും കാണാന്‍ കഴിയാത്ത ഒരുവനു് കേരളസഭാചരിത്രത്തില്‍ എന്തെങ്കിലും താല്പര്യം ഉണ്ടാവാന്‍ സാദ്ധ്യതയില്ലല്ലോ. ഏതെങ്കിലും “വികൃതാനന്ദമയിക്കുഞ്ഞമ്മയ്ക്കു്” വിശന്നപ്പോള്‍‍ പിടക്കോഴി ഓടിച്ചെന്നു് മുലകൊടുത്തു എന്നു് പറഞ്ഞാല്‍ അതും വിശ്വസിക്കുന്ന ഒരു നാട്ടില്‍ രണ്ടു് സഹസ്രാബ്ദങ്ങള്‍ക്കു് മുന്‍പു് പലതും നടന്നു എന്നു് പറഞ്ഞാല്‍ ആളുകള്‍ അതു് വിശ്വസിക്കുന്നതില്‍ എന്തത്ഭുതം? എന്തും വിശ്വസിക്കുന്ന കുറെ മനുഷ്യര്‍ ലോകത്തില്‍ എന്നുമുണ്ടായിരുന്നു, ഭാവിയില്‍ എന്നാളും ഉണ്ടായിരിക്കുകയും ചെയ്യും. സ്വന്ത നിലപാടുകള്‍ക്കു് അവരുടേതായ നീതീകരണങ്ങളും അവര്‍ക്കുണ്ടാവും. അത്തരം വിഡ്ഢിത്തങ്ങള്‍ക്കായി ചിലവഴിക്കാന്‍ മാത്രം സമയം എനിക്കില്ല.

യൂറോപ്പിലെ ആദ്യകാല ക്രിസ്തുമതചരിത്രം പഠിച്ചാല്‍ ഏതെല്ലാം “സാത്താന്റെ വഴികളിലൂടെ” ആണു് സഭ ഇന്നത്തെ നിലയില്‍ എത്തിയതെന്നു് മനസ്സിലാവും. അവ മുഴുവന്‍ ബ്ലോഗ് വഴിയോ, മറ്റു് രീതിയിലോ എല്ലാവര്‍ക്കും മനസ്സിലാക്കിക്കൊടുക്കുക എന്നതു് മനുഷ്യസാദ്ധ്യമല്ല. എന്റെ ലേഖനങ്ങളുടെ ലക്‍ഷ്യം ഈ വിഷയത്തില്‍ താല്പര്യവും, critical ആയി ചിന്തിക്കാന്‍ വേണ്ട മുന്നറിവും കഴിവും ഉള്ളവര്‍ക്കു് അതിനൊരു stimulus ആവുക എന്നതു് മാത്രമാണു്.

പൊതുവായി പറഞ്ഞാല്‍, മതങ്ങള്‍ ചെയ്യുന്നതു് ചിന്തയുടെയോ ബുദ്ധിയുടെയോ സഹായമില്ലാതെ ഭാഗ്യാനുഭൂതിയില്‍ എത്തിച്ചേരുവാന്‍ മനുഷ്യരെ സഹായിക്കുക എന്നതാണു്. ഇങ്ങനെ കപടമായ ഒരു ഭാഗ്യാനുഭൂതി ആഗ്രഹിക്കാത്ത മനുഷ്യരും ലോകത്തിലുണ്ടു്. എന്തും മുഖവിലയ്ക്കെടുക്കാന്‍ ആഗ്രഹിക്കാത്തവരാണവര്‍. നല്ലൊരു വിഭാഗം ശാസ്ത്രജ്ഞരും ഇക്കൂട്ടത്തില്‍ പെടുന്നവരാണു്. ദൈവത്തില്‍ വിശ്വസിക്കാന്‍ അജ്ഞത ഒരിക്കലും ഒരു തടസ്സമാവാറില്ലല്ലോ. മോക്ഷം നേടാന്‍ തടിച്ചുകൂടുന്ന ജനലക്ഷങ്ങള്‍ കാട്ടിക്കൂട്ടുന്ന കോപ്രാഞ്ചങ്ങള്‍ അതിനു് തെളിവു് നല്‍കുന്നില്ലെങ്കില്‍ പിന്നെ എനിക്കൊന്നും പറയാനില്ല.

“ഇന്നോളം ഒരു മതവും സോപാധികമോ നിരുപാധികമോ, തത്വങ്ങളിലൂടെയോ ഉപമകളിലൂടെയോ ഉള്ള യാതൊരു സത്യവും ഉള്‍ക്കൊണ്ടിട്ടില്ല” എന്നു് Friedrich Nietzsche പറയുമ്പോള്‍ നമുക്കതു് provocative ആയി തോന്നാം. അതിലെ വസ്തുതായാഥാര്‍ത്ഥ്യം മനസ്സിലാക്കണമെങ്കില്‍ വ്യത്യസ്ത മേഖലകളില്‍ വിശാലമായ അറിവു് നമുക്കുണ്ടായിരിക്കണം. തത്വചിന്തയില്‍, ഗണിതശാസ്ത്രത്തില്‍, ഫിസിക്സില്‍, മറ്റു് പ്രകൃതിശാസ്ത്രങ്ങളില്‍, മതഗ്രന്ഥങ്ങളില്‍ എല്ലാം വേണ്ടത്ര ഉള്‍ക്കാഴ്ച നേടേണ്ടതു് മുന്‍‌വിധി ഇല്ലാതെ വസ്തുതകള്‍ മനസ്സിലാക്കാന്‍ ആവശ്യമാണു്. reasonable ആയിട്ടു് ചിന്തിക്കുവാന്‍, വസ്തുതകളെ വിഭിന്ന കാഴ്ചപ്പാടില്‍ നിന്നുകൊണ്ടു് വീക്ഷിക്കുവാന്‍ അതുപോലൊരു ബഹുമുഖമായ അറിവു് ആവശ്യമാണു്. എങ്കില്‍ മാത്രമേ “സത്യങ്ങളുടെ” ആഴങ്ങളിലേക്കു് ഇറങ്ങിച്ചെല്ലാന്‍ നമുക്കു് കഴിയൂ. മതതത്വങ്ങളിലെ “അറിവു്” മാത്രം അതിനു് മതിയാവുകയില്ല. മതതത്വശാസ്ത്രം എന്നതുതന്നെ അബദ്ധമാണു്, കാരണം മതതത്വങ്ങള്‍ ശാസ്ത്രമല്ല, ആവുകയുമില്ല.

തലച്ചോറു് കാര്യങ്ങളെ വിലയിരുത്തുന്നതു് താരതമ്യത്തിലൂടെയാണു്. പഠനം വഴി, അനുഭവങ്ങള്‍ വഴി എത്ര കൂടുതല്‍ “ചിത്രങ്ങള്‍” തലച്ചോറില്‍ “ശേഖരിക്കുവാന്‍” നമുക്കു് കഴിഞ്ഞിട്ടുണ്ടോ, അത്രമാത്രം യാഥാര്‍ത്ഥ്യത്തോടു് അടുത്തു് നില്‍ക്കുന്നതാവാനേ നമ്മുടെ വിലയിരുത്തലുകള്‍ക്കു് കഴിയൂ എന്നു് cognitive neurobiology നമ്മെ പഠിപ്പിക്കുന്നുമുണ്ടല്ലോ. ഈ ശേഖരിക്കല്‍ പോലും നമ്മുടെ ബോധപൂര്‍വ്വമായ പങ്കാളിത്തമില്ലാതെ automatic ആയിട്ടാണു് തലച്ചോറില്‍ പൂര്‍ത്തീകരിക്കപ്പെടുന്നതു് എന്നതാണു് ഏറെ രസം. നമ്മുടെ അറിവുകള്‍ക്കു് അതീതമായ അളവുകോലുകള്‍ നമുക്കുണ്ടാവുമോ?

വായിച്ചതിനു് നന്ദി!

കാവലാന്‍ May 26, 2008 at 2:12 PM  

പ്രിയ സീകെ,താങ്കളൊരു ബൈബിള്‍ വിരോധിയായിരുന്നില്ലെങ്കില്‍ ഇത്രയും നല്ല ഹാസ്യം വായനക്കാരനു നഷ്ടാമാകുമായിരുന്നു.വീക്ഷണങ്ങളിലൂടെ താങ്കളെത്തിച്ചേര്‍ന്ന കാഴ്ചപ്പാടിനോട് ദൈവത്തിനു പോലും അമര്‍ഷമുണ്ടാവില്ല.

അഥവാ എത്ര അമര്‍ഷകാരനായാലും
"നിങ്ങള്‍ കേരളത്തില്‍ ജനിക്കും; സ്വാമിമാരും സ്വാധാകരന്മാരും നിങ്ങളെ ഭരിക്കും; നിങ്ങള്‍ ഏകജാലകത്തില്‍ പലജാലകങ്ങള്‍ കാണും; നിങ്ങള്‍ തുണിയില്ലാതെ ദൈവസന്നിധി തേടും;------ ",“വികൃതാനന്ദമയിക്കുഞ്ഞമ്മയ്ക്കു്” വിശന്നപ്പോള്‍‍ പിടക്കോഴി ഓടിച്ചെന്നു് മുലകൊടുത്തു ".......(എനിക്കു വയ്യ ക്വാട്ടുചെയ്യാന്‍)
മുതലായ വരികള്‍കണ്ട് ഒന്നു ചിരിക്കാതിരിക്കാനെങ്ങനെ കഴിയും?.

പുരാണകഥയില്‍ വായിച്ചിട്ടുണ്ട് 'വിപരീത ഭക്തി' എന്ന ഒരു പരിപാടിയുണ്ടത്രേ ആരാധിക്കുന്നതിനു പകരം അധിക്ഷേപിക്കല്‍ ആണ് അക്കൂട്ടരുടെ പരിപാടിയെന്ന്.അവരും ദൈവത്തിനോടു പടവെട്ടി വീരസ്വര്‍ഗ്ഗം പൂകും എന്നൊക്കെയാണ് വിവരണം താങ്കള്‍ അക്കൂട്ടത്തില്‍ പെട്ടെന്നു കരുതുക എന്നാലും താങ്കളെ ദൈവം വെറുതെ വിടില്ല.മൂക്കുകൊണ്ട് 'ഞങോവ,മോശ,നോഹ,ക്രമൃത്രാനന്ദ ഞമഹ' എന്നെഴുതിച്ചിട്ടേ താങ്കളെ സൂചിപ്പഴുതിലൂടെ കയറ്റി വിടൂ ലിതു സത്യം സത്യം സത്യത്യത്യം.

സി. കെ. ബാബു May 26, 2008 at 2:56 PM  

കാവലാനെ,

സൂചി തുന്നാന്‍ മാത്രമുള്ളതാണെന്നു് യേശുവിന്റെ കാലത്തെ അറിവല്ലേ? ഇന്നത്തെ നസ്രാണികളുടെ സൂചി ഒട്ടകത്തിനെ കടത്തിവിടാനുള്ളതാണു്. അതിന്റെ പഴുതിലൂടെ ഒട്ടകത്തിനു് മാത്രമല്ല, ആഫ്രിക്കന്‍ ആനക്കു് വരെ പാട്ടും പാടി കടന്നു പോകാം. പാട്ടു് പാടാന്‍ അറിയണമെന്നേയുള്ളു! :)

മകനായ ഞാന്‍ ഇങ്ങനെയൊരു തലതെറിച്ചവന്‍ ആയതിനു് പിതാവായ ദൈവമല്ലാതെ മറ്റാരാണു് ഉത്തരവാദി? “വീരസ്വര്‍ഗ്ഗപടിവാതില്‍ക്കല്‍” എത്തുമ്പോഴേക്കും “അക്ഷരങ്ങള്‍ പണ്ടേ മറന്ന” ഞാന്‍ മൂക്കുകൊണ്ട് 'ഞങോവ,മോശ,നോഹ,ക്രമൃത്രാനന്ദ ഞമഹ' എന്നെഴുതണമെങ്കില്‍ ആദ്യം ദൈവം അതെന്നെ എഴുതിക്കാണിക്കേണ്ടി വരുമെന്നു് ദൈവത്തിനറിയാം. അതിനാല്‍ ഒരുവട്ടം കണ്ണടക്കുന്നതാണു് നല്ലതെന്നു് ദൈവം ചിന്തിക്കും. ഇല്ലെങ്കില്‍ അങ്ങേരുടെ കഷ്ടകാലം!

മൂര്‍ത്തി May 26, 2008 at 10:12 PM  

എല്ലാം വായിക്കുന്നുണ്ട്..തുടരുക..
qw_er_ty

Simy Chacko :: സിമി ചാക്കൊ May 26, 2008 at 11:53 PM  

ഓ.ടൊ തുടരുന്നതില്‍ ക്ഷമിക്കുക..

മറുപടിക്കു വളരെ അധികം നന്ദീ. കൂടുതല്‍ കാര്യങ്ങള്‍ മനസ്സിലാക്കാന്‍ മറുപടി സഹായിച്ചു. പുലിക്കുന്നെലിന്റെ അഭിമുഖത്തിലെ താഴേകാണുന്ന ഭാഗം , ഇപ്പൊഴുള്ള എന്റെ വിചാരങ്ങളൊടു കൂടുതല്‍ അടുത്തു നില്കുന്നു. താന്കള്‍ ഇതു എങ്ങ്നെ കാണുന്നു, എന്നു സമയം കിട്ടുമ്ബ്ബൊള്‍ എഴുതാമോ. താന്കളുറ്റെ മിക്ക് ലേഖനളും ഇതിലൊരു വ്യക്തത വരുത്താനുള്ളതാണെന്നറിയാം

"ഇനി അവസാനമായി ഒരു ചോദ്യംകൂടി മതഗ്രന്ഥങ്ങളെ എങ്ങനെയാണ്‌ കാണേണ്ടത്‌?

ഏതൊക്കെ മതഗ്രന്ഥങ്ങളില്‍ നന്മയുടെ അംശമുണ്ടോ അവയൊക്കെ സ്വീകരിക്കുക. അവയില്‍ എന്തെങ്കിലും തിന്മയുടെ അംശം ഉണ്ടെന്ന്‌ കണ്ടാല്‍ അവ കൂട്ടിച്ചേര്‍ക്കപ്പെട്ടതോ സ്വാര്‍ത്ഥ താല്‌പര്യപ്രകാരം എഴുതിയതോ ആണ്‌ എന്നു കരുതി തള്ളിക്കളയുക.

മതഗ്രന്ഥങ്ങളെല്ലാം തന്നെ പിന്നീട്‌ ക്രോഡീകരിക്കപ്പെട്ടിട്ടുളളവയാകയാല്‍ അത്‌ എഴുതിയവരുടെ ചിന്തകളും സ്വാര്‍ത്ഥ താല്‌പര്യങ്ങളും അതില്‍ ഉണ്ടാകാന്‍ ഇടയുണ്ട്‌."

സി. കെ. ബാബു May 27, 2008 at 9:38 AM  

നന്ദി, മൂര്‍ത്തി.

സിമി ചാക്കൊ,

എന്താണു് നന്മ? എന്താണു് തിന്മ? ഏതെങ്കിലും ഒരു സമൂഹവുമായി ബന്ധപ്പെടുത്തിക്കൊണ്ടല്ലാതെ ഒരു വ്യക്തിയുടെ സ്വഭാവം നല്ലതോ ചീത്തയോ എന്നു് പറയാനാവുമോ? ഒരു Mr. X-ന്റെ സ്വഭാവം മോശമാണു് അല്ലെങ്കില്‍ നല്ലതാണു് എന്ന വാചകത്തിനു് ഏതെങ്കിലുമൊരു സാമൂഹികപശ്ചാത്തലത്തില്‍ മാത്രമേ എന്തെങ്കിലുമൊരു അര്‍ത്ഥമുള്ളു എന്നു് ലോകപ്രസിദ്ധ മനഃശാസ്ത്രജ്ഞന്‍ Alfred Adler ഒരിക്കല്‍ പറഞ്ഞു.

പശ്ചിമയൂറോപ്പില്‍ റെയില്‍‌വേ സ്റ്റേഷനിലോ, റോഡരികിലോ കാമുകീകാമുകന്മാര്‍ ചുംബിച്ചും ‍ആലിംഗനം ചെയ്തും നില്‍ക്കുന്നതു് കണ്ടാല്‍ അതു് ആര്‍ക്കും ഒരു ചൊറിച്ചിലും ഉണ്ടാക്കാറില്ല. അതു് പരസ്യമായ ഒരു “ലൈംഗികബന്ധമായും” മറ്റും ആരും വിവക്ഷിക്കാറുമില്ല. സ്നേഹവും കാമവും തമ്മില്‍ തിരിച്ചറിയാന്‍ അവിടങ്ങളില്‍ കമിതാക്കള്‍ക്കും ജനങ്ങള്‍ക്കും അറിയാം. കേരളത്തിലെ ഏതെങ്കിലും ഒരു ബസ് സ്റ്റാന്‍ഡില്‍ ഇണകള്‍ അരമണിക്കൂര്‍ കെട്ടിപ്പുണര്‍ന്നു് നിന്നാല്‍ എന്താവും പുകിലു്? അതായതു്, നന്മയും തിന്മയും, ശരിയും തെറ്റുമൊക്കെ ആപേക്ഷികം മാത്രമാണു്.

സദാചാരത്തിനു് അതിനായിത്തന്നെ മതങ്ങളുടെ ആവശ്യമില്ല എന്നു് തത്വചിന്തകന്‍ Immanuel Kant വ്യക്തമാക്കിയിട്ടുണ്ടു്. നന്മയേതു്, തിന്മയേതു് എന്നു് സ്വയം തീരുമാനിക്കാന്‍ കഴിയുന്ന ഒരുവനു് മതഗ്രന്ഥങ്ങള്‍ എന്തിനു്? മനുഷ്യന്‍ സ്വാഭാവികമായി സ്വാര്‍ത്ഥനാണു്. സ്വന്തനേട്ടമാണു് അവന്റെ ലക്‍ഷ്യം. അതു് പ്രകൃതിനിയമമാണു്, അതുകൊണ്ടു് ശരിയുമാണു്. പക്ഷേ അതേസമയം തന്നെ മനുഷ്യന്‍ ഒരു സമൂഹജീവിയുമാണു്. അതിനാല്‍ സമാധാനപരമായ ഒരു സാമൂഹികജീവിതം സാദ്ധ്യമാവണമെങ്കില്‍ നിയമങ്ങളും നിയന്ത്രണങ്ങളും വേണം. അതു് സമൂഹം രൂപം നല്‍കുന്ന നിയമങ്ങള്‍ ആയിരിക്കണം. മതങ്ങളുടേതാവരുതു്.

സാമൂഹികനിയമങ്ങള്‍ കാലാനുസൃതമായി നിരന്തരം നവീകരിക്കപ്പെട്ടുകൊണ്ടിരിക്കണം. രാജ്യത്തിന്റെ ഭരണഘടനപോലും സാമൂഹികമാറ്റങ്ങള്‍ക്കു് അനുസരിച്ചു് പുതുക്കി എഴുതപ്പെടണം. ബൈബിളോ ഖുര്‍‌ആനോ “പുതുക്കാന്‍” ക്രിസ്ത്യാനികളോ മുസ്ലീമുകളോ സമ്മതിക്കുമോ? സ്വന്തം വിശ്വാസപ്രമാണങ്ങള്‍ തിരുത്താന്‍ മറ്റു് മതങ്ങള്‍ സമ്മതിക്കുമോ? അതായതു്, മാറിക്കൊണ്ടിരിക്കുന്ന സാമൂഹികഘടനകളെ തൃപ്തിപ്പെടുത്താന്‍ “മാറ്റം” എന്നതു് അടിസ്ഥാനപരമായിത്തന്നെ നിഷേധിക്കുന്ന മതഗ്രന്ഥങ്ങള്‍ക്കു് ഒരിക്കലും കഴിയില്ല. അതിനാല്‍, മതവും ആത്മീയതയും അവയുമായി ബന്ധപ്പെട്ട മറ്റു് കാര്യങ്ങളും രാഷ്ട്രീയത്തില്‍ നിന്നും എന്നേക്കുമായി വേര്‍പെടുത്തപ്പെടണം. സമൂഹത്തിന്റെ പൊതുവായ നിയമം എന്ന നിയന്ത്രണശക്തിക്കു് എല്ലാ മതങ്ങളും ജനങ്ങളും നിരുപാധികം കീഴ്പ്പെടണം. പ്രവര്‍ത്തനക്ഷമമായ ജനാധിപത്യങ്ങളില്‍ അതാണു് സ്ഥിതി. ജനാധിപത്യം വിജയിക്കണമെങ്കില്‍ ജനങ്ങള്‍ പടിപടിയായിട്ടെങ്കിലും ബോധവത്ക്കരിക്കപ്പെടണം.

വിശ്വാസം വ്യക്തിഗതമാവണം. മതഗ്രന്ഥങ്ങളില്‍ എന്തു് സ്വീകരിക്കണം, ഏതു് പണ്ഡിതന്റെ വ്യാഖ്യാനം അംഗീകരിക്കണം, ദിവസത്തില്‍ എത്രവട്ടം പ്രാര്‍ത്ഥിക്കണം എന്നതെല്ലാം ഓരോരുത്തന്റെ സ്വാതന്ത്ര്യം. അതു് പൊതുജീവിതത്തെ ഒരിക്കലും തടസ്സപ്പെടുത്തുന്ന വിധത്തിലാവരുതു്.

പുലിക്കുന്നേല്‍ പറഞ്ഞതു് തത്വത്തില്‍ ശരിയാണു്, തത്വത്തില്‍ മാത്രം! മതഗ്രന്ഥങ്ങളിലെ നന്മയും തിന്മയും തിരിച്ചറിഞ്ഞു് തള്ളാനും കൊള്ളാനും കഴിവുള്ളവരാണു് വിശ്വാസികള്‍ എങ്കില്‍ മാത്രമേ അത്തരം ഒരു concept പ്രാവര്‍ത്തികമാവുകയുള്ളു എന്നുമാത്രം. ഞാന്‍ കാണുന്ന വിശ്വാസികളില്‍ അധികപങ്കും അപസ്മാരം ബാധിച്ചവരെപ്പോലെ പോട്ടയിലെയും, “പൂര്‍വ്വാശ്രമത്തിലെയും, പശ്ചിമാശ്രമത്തിലെയും” സ്വാമി-സന്ന്യാസിനി- സന്ന്യാസിമാരുടെ കാല്‍ച്ചുവട്ടില്‍ കിടന്നു് ഞെളിപിരി കൊള്ളുന്നവരാണു്. അവരൊക്കെ മതഗ്രന്ഥങ്ങളുടെ ഉള്ളടക്കത്തെപ്പറ്റി reasonable ആയി ചിന്തിക്കാന്‍ കഴിയുന്നവരാണെന്നു് പറയണമെങ്കില്‍ ഒന്നുകില്‍ നമ്മള്‍ ഭ്രാന്തന്മാരായിരിക്കണം, അല്ലെങ്കില്‍ ഏറ്റവും ചുരുങ്ങിയ പക്ഷം പിടിച്ചാല്‍ കിട്ടാത്ത optimists‍എങ്കിലും ആയിരിക്കണം!

സാമൂഹിക പ്രശ്നങ്ങളെ യാഥാര്‍ത്ഥ്യബോധത്തോടെയും പ്രായോഗികബുദ്ധിയോടെയും നേരിടുകയാണു് ഉചിതമെന്നു് തോന്നുന്നു. ആത്മീയതയും ഭൌതികതയും, മതവും രാഷ്ട്രീയവും, സ്വപ്നവും സത്യവുമെല്ലാം സഹസ്രാബ്ദങ്ങളായി വേര്‍പെടുത്താനാവാത്തവിധം കെട്ടുപിണഞ്ഞു് കിടക്കുന്ന ഒരു സമൂഹത്തില്‍ അതത്ര എളുപ്പമല്ലെന്നറിയാമെങ്കിലും!

ചന്ദ്രശേഖരന്‍.പി May 27, 2008 at 5:05 PM  

പോസ്റ്റുകളെല്ലാം വായിക്കാറുണ്ടു.
ശ്രദ്ധേയങ്ങളായ കുറിപ്പുകള്‍.
പ്രതികരിക്കണമെന്നുണ്ട്‌.
തിരക്കുകളൊഴിഞ്ഞു നെറ്റില്‍ കയറാന്‍
വല്ലപ്പോഴുമേ സമയം കിട്ടുന്നുള്ളൂ.

ചന്ദ്രായനം

Reji May 27, 2008 at 6:12 PM  

എന്തിനാണീ പാതിരിമാരും പാസ്റ്റര്‍മാരും എല്ലാവരെയും ക്രിസ്ത്യാനികളാക്കി രക്ഷിക്കാന്‍ ഇറങ്ങിതിരിച്ചിരിക്കുന്നത്‌?. ദൈവത്തിന്റെ ഇഷ്ടം അതായ്‌രുന്നെങ്കില്‍ അദേഹം എല്ലാവരെയും ക്രിസ്ത്യാനിയായി ജനിപ്പിക്കില്ലായിരുന്നോ?. .പരിശ്ച്ചേദനം ആവശ്യമായ്‌രുന്നുവെങ്കില്‍ അത്‌ ദൈവം തന്നെ നിറവേറ്റുകയില്ലയിരുന്നൊ എന്നു പൗലോസ്‌ സ്ലീഹ പറഞ്ഞതുമാതിരി ....
(അപ്പോള്‍ 2000 വര്‍ഷം മുന്‍പുള്ളവരുടെ കാര്യമോ... ആര്‍ക്കറിയാം...!!)


ഈ ഇവാഞ്ജലൈസേഷന്‍ ഒരു തരത്തില്‍ കപ്പയും കഞ്ഞിയും കഴിച്ചു ശീലിച്ച നമ്മളെ ബര്‍ഗറു തിന്നാന്‍ നിര്‍ബന്ദ്‌ ധിക്കുന്നതുമാതിരിയാണ്‌....

സി. കെ. ബാബു May 27, 2008 at 7:21 PM  

വായനക്കു് നന്ദി, ശ്രീ ചന്ദ്രശേഖരന്‍.

reji,

പൌരോഹിത്യം വെറും ഒരു തൊഴില്‍ മാത്രമാണു്. ഒരു മരുന്നിന്റെ പ്രതിനിധി ആ മരുന്നു് വിറ്റു് കിട്ടുന്ന കമ്മീഷന്‍ കൊണ്ടു് ജീവിക്കുന്നു. ദൈവത്തിന്റെ പ്രതിനിധികളായ പുരോഹിതര്‍ ദൈവത്തെ വിറ്റു് ജീവിക്കുന്നു. medical representative പക്ഷെ എന്തെങ്കിലും വില്‍ക്കുന്നെങ്കിലുമുണ്ടു്. നല്‍കാന്‍ കഴിയാത്ത വാഗ്ദാനങ്ങള്‍ വില്‍ക്കുന്നതാണു് കാപട്യം. സര്‍വ്വശക്തന്‍ എന്നു് അവര്‍ തന്നെ വിശേഷിപ്പിക്കുന്ന ഒരു ദൈവത്തെ സഹായിക്കാന്‍ കച്ച കെട്ടിയിറങ്ങുന്നവര്‍ക്കു് എവിടെയോ എന്തോ തകരാറുണ്ടാവണം! അവരുടെ തലച്ചോറില്‍ ചില signals ഒന്നുകില്‍ രൂപമെടുക്കുന്നില്ല അല്ലെങ്കില്‍ എത്തേണ്ടിടത്തു് എത്തുന്നുണ്ടാവില്ല.

സായിപ്പു് പണ്ടു് കച്ചവടത്തിനെന്ന പേരില്‍ കപ്പലില്‍ എത്തുമ്പോള്‍ മുകള്‍‍ത്തട്ടില്‍ കുരിശും ബൈബിളും പ്രദര്‍ശിപ്പിച്ചിരിക്കും! അടിത്തട്ടില്‍ തോക്കുകളും പടക്കോപ്പുകളും ഒളിച്ചു് വച്ചിട്ടുമുണ്ടാവും! ദരിദ്രരാജ്യങ്ങളിലെ അധികാരിവിഡ്ഢികള്‍‍ സായിപ്പിനെ “ദൈവവിശ്വാസിയായി‍‍” കരുതി, ഇരയായി നീട്ടുന്ന “സമ്മാനങ്ങളും‍” വാങ്ങി സ്വന്തം ജനങ്ങളെ ഒറ്റിക്കൊടുക്കും. പുതിയ രാജ്യത്തു് കാലുറച്ചാല്‍ പിന്നെ ലോക്കല്‍ രാജാക്കന്മാരെ തമ്മിലടിപ്പിക്കാന്‍ തുടങ്ങും. എന്നിട്ടു് തന്മയത്വമായി അതില്‍ ഇടപെട്ടു് തന്‍‌കാര്യം നേടുകയും ചെയ്യും. East India Company ഒക്കെ ചെയ്തതു് മറ്റൊന്നുമായിരുന്നില്ല.

ഇന്നു് സ്വന്തം ജനങ്ങളെ ഒറ്റിക്കൊടുക്കുന്ന ജോലി മതങ്ങള്‍ നേരിട്ടാണു് നടത്തുന്നതു്. അല്പസ്വല്പം ജനസേവനമൊക്കെ‍ നടത്തി അവര്‍ മനുഷ്യരുടെ കണ്ണില്‍ പൊടിയിടുമ്പോള്‍ ജനം അതു് തിരിച്ചറിയുന്നില്ല. ചില ശിങ്കിടികള്‍ ഈ ചൂഷകരുടെ വക്കാലത്തു് പിടിച്ചു് വെള്ളം കലക്കി ‍അവര്‍ക്കു് “മീന്‍ പിടിക്കാന്‍” കൂടുതല്‍ സൌകര്യം ഉണ്ടാക്കിക്കൊടുക്കുകയും ചെയ്യുന്നു.

Simy Chacko :: സിമി ചാക്കൊ May 28, 2008 at 12:01 AM  

മറുപടിക്കും വിശദ്ദികരണങ്ങള്ക്കും വളരെ നന്ദി

- സിമി

Jayachandra Menon November 13, 2008 at 2:52 PM  

പണ്ടൊരു കഥ കേട്ടിട്ടുണ്ട്. അമേരിക്കയിലെ ആദിവാസി പറയുന്നതാണ്. “അവര് വന്നപ്പൊ അവരുടെ കയ്യിൽ ബൈബിളും ഞങ്ങടെ കയ്യിൽ ഭൂമിയും ഉണ്ടായിരുന്നു. ഇപ്പൊ ഞങ്ങടെ കയ്യിൽ ബൈബിളും ഭൂമിയൊക്കെ അവരുടെ കയ്യിലും”

Google+ Followers

  © Free Blogger Templates Blogger Theme by Ourblogtemplates.com 2008

Back to TOP